Norlandair ehf

Norlandair var stofnað 1. júní 2008 og tók þá við rekstri Twin Otter flugvéla sem áður voru í eigu Flugfélags Íslands. Félagið á hins vegar rætur að rekja til Flugfélags Norðurlands sem stofnað var á Akureyri árið 1974. Fyrsta Twin Otter vélin var keypt árið 1975. Hún var notuð bæði í áætlunarflug og leiguflug innanlands sem og á austurströnd Grænlands.

Árið 1997 sameinaðist Flugfélag Norðurlands og Flugleiðir innanlands og var nafninu breytt í Flugfélag Íslands (Icelandair). Twin Otter vélarnar voru áfram gerðar út frá Akureyri. Allt viðhald vélanna fór fram þar, auk þess sem leiguflugsdeild Flugfélags Íslands var starfrækt á Akureyri. Árið 2008 hætti Flugfélag Íslands rekstri Twin Otter vélanna. Fyrrum starfsmenn Flugfélags Íslands ásamt hópi fjárfesta stofnuðu þá flugfélag undir heitinu Norlandair (sem var það nafn sem Flugfélag Norðurlands notaði erlendis) og tók hið nýja félag við rekstri vélanna.  

Í dag rekur Norlandair þrjár Twin Otter vélar og fjórar Beech 200 King Air. Norlandair heldur úti áætlunarflugi frá Akureyri til Vopnafjarðar, Þórshafnar og Grímseyjar og frá Reykjavík til Bíldudals, Gjögurs og Hafnar. Einnig sinnir félagið áætlunarflugi til Constable Point á Austurströnd Grænlands (Scoresbysundi) auk fjölda leiguverkefna, bæði innanlands og ekki síður á Grænlandi. 

Frá áramótum 2023-2024 hefur Norlandair sinnt nánast öllu sjúkraflugi innan Íslands samkvæmt samningi við Heilbrigðisráðuneytið. Í sjúkraflugið notar félagið Beech King Air 250 flugvél sem er sérútbúin fyrir sjúkraflug. Vélin er staðsett á Akureyrarflugvelli og er ávallt reiðubúin í útkall. Þegar þess er þörf hefur Norlandair aðra samskonar vél sem hægt er að kalla út.