Sláturfélag Suðurlands var stofnað við Þjórsárbrú 28. janúar 1907 af 565 stofnendum.

Sláturfélag Suðurlands er með höfuðstöðvar að Fosshálsi 1, Reykjavík. Að Fosshálsi eru auk skrifstofu, markaðs- og söludeildir. Á Hvolsvelli er meginhluti matvælaiðnaðar staðsettur ásamt frystihúsi og vörudreifingu. Sláturhús rekur félagið á Selfossi ásamt úrbeiningu á kjöti og pökkunarstöð.

Innflutningsdeild félagsins er staðsett að Fosshálsi 1 í Reykjavík. Deildin hefur einkaumboð fyrir mörg þekkt vörumerki sem eru leiðandi hvert í sínum vöruflokki á heimsmarkaði. Má þar nefna fjölda vörumerkja af sælgæti frá Mars fyrirtækinu, Barilla pasta, Mutti tómatvörur, Pedigree og Whiskas dýramat og krydd frá McCormick.

Sláturfélagið hóf samstarf við Norsk Hydro (nú Yara) á árinu 1999 um innflutning á áburði og sér nú um sölu og dreifingu áburðar á landsvísu í samvinnu við Yara. Það er stefna Sláturfélagsins að bjóða bændum hágæða áburð á hagstæðu verði sem stuðlar að lækkun framleiðsukostnaðar og hreinleika afurða. Yara leggur áherslu á að vinna með bændum við að þróa áburð sem uppfyllir ströngustu kröfur um um gæði og umhverfisáhrif.

Sláturfélagið er í samstarfi við Dansk Landbrugs Growareselskab (DLG) í innflutningi á kjarnfóðri. DLG er stærsti framleiðandinn á kjarnfóðri í Danmörku með um 29.000 bændur sem félagsmenn. DLG er með góða markaðshlutdeild á kjarnfóðri í Danmörku auk þess að flytja út kjarnfóður og er auk þess stærsta fóðurfyrirtæki Norðurlanda.

Reykjagarður hf. er dótturfélag SS. Reykjagarður framleiðir og selur kjúklingaafurðir m.a undir Holta vörumerkinu. Sláturhús og kjötvinnsla er á Hellu en eldisstöðvar á Suður- og Vesturlandi fyrir utan eina í V-Húnavatnssýslu. Hollt & gott efh. er dótturfélag SS en félagið er leiðandi aðili í framleiðslu á salati og grænmeti í neytendapakkningum. SS á einnig 26% eignarhlut í fyrirtækinu Orkugerðinni hf. sem vinnur fitu og mjöl úr dýraleifum.